Miyerkules, Pebrero 8, 2012

tula ng buhay


Ang Buhay ng Tao


Ang buhay ay ano, mahalagang salita.
Sulang nagniningning sa bawat puso't diwa.
Mahirap arukin at mahirap makita
ang iwing kahulugan at iwing adhika.


Sa taong mabuti at marangal ang budhi,
malinis na hangin ang laging dumadampi;
datapwa kapag mayroong pagkakamali,
ang gawang linsil ay may parusang masidhi.


Ang halamang bagong sibol kung mapapansin,
dagling nalalanta kung di didiligin.
Tulad ng pag-ibig na walang pumapansin
nakatanim man sa lupa'y mamamatay din.


Bahay mang malaki pag ang may-ari'y maramot,
mabuti pa'y kubo na bukas sa kumakatok.
Anumang buti kung may halong pag-iimbot
mawawala ang bango't magiging mabantot.


Talaga ngang ang buhay ay parang kawayan,
dalhin man ng baha ay walang kamatayan.
Doon sa malayo,sa huling hinantungan,
sisibol na muli ang bagong kalinangan.


Ang halimuyak ng 'sang magandang bulaklak,
pangarapin at lasapin, lubhang kaysarap.
Ngunit laging isipin at laging mag-ingat
pagkat may bulaklak na may lason sa langhap.


Ang tao ay bunga ng hirap at pagtitiis.
Nilikha na kakambal ang maraming hapis.
Datapwa ang ilog ay laging may balisbis.
Ang buhay ay iikot na laging talilis.


Aanhin ang buhay kung walang pagmamahal?
Aanhin ang boses kapag ito'y garalgal?
Sa entablado ng Diyos, laging tinatanghal,
taong mahirap man ngunit mayroong dangal.


Anupa't ang buhay parang gulong ng bukas,
mababa ka ngayon, bukas naman ay mataas.
Ang matamis na prutas ay laging may katas.
Tikman mo ngayon bago maging lasong ganap.


Sapagkat ang buhay ay parang kawikaan,
sa'yo at sa'kin, iba't-ibang kahulugan.
Pagnilayan mo ngayon at pag-isipan
bago pa tuluyang mawala ng lubusan!

13 komento:

  1. Napakahusay mong magsulat ng tulang Filipino. Ipagpatuloy mo lang. :]

    TumugonBurahin
  2. Salamat po ng marami sa mga tulad mong nakapupuri pa ng ating panulaan...

    TumugonBurahin
  3. Paumanhin sa aking kamangmangan- saan ba ang Rehiyon 7? Napakahusay mong sumulat sa Filipino. Hinahangaan ko ang blog mo. Mabuhay!

    TumugonBurahin
  4. salamat po...
    rehiyon 7? visayas area ata...minsa'y mangmang din ako...hehehe

    TumugonBurahin
  5. ako nga pala'y taga-Sultan Kudarat, Rehiyon 12....

    TumugonBurahin
  6. napakahusay mong mag sulat ng tulang filipino!

    TumugonBurahin
  7. ipag patuloy mo lang yan:)

    TumugonBurahin
  8. Lubos kong ikinagagalak na may mga makata pa ring tayong mga kababayan. Ipagpatuloy mo lang ang iyong ginagawa at ito'y magbubunga ng magandang bukas. Lubos kitang binabati!....Marlon L. Olivares....Bugallon, Pangasinan

    TumugonBurahin
  9. salamat po sa tulang ito ..
    nagkaroon po ako ng idea sa aking gagawing tula ..
    :") salamat po muli..

    napaka.husay muh ..

    TumugonBurahin
  10. ANG TULANG ITO AY NAPAKAGANDA.MAHUSAY ANG SUMULAT NITO.

    TumugonBurahin
  11. ako'y saludo sa iyong husay
    sa pagsulat ng tula'y sanay
    huwag kalimutan humingi ng gabay
    sa Panginoon, sa atin nagbigay ng buhay

    BOW

    TumugonBurahin
  12. pwed manghiram ng mga tula d2???
    pang proyekto lng

    TumugonBurahin

KA-patid-puso-barkada-pamilya

IKAW

Walang maaaring makaalam kung sino ka maliban sa iyong sarili...sapagkat ang sinumang nagsasabing kilala niya ang pagkatao ng isang tao ay isang nilalang na nilikha sa kawalang muwang sa sariling kaanyuan.Ikaw ay tunay na ikaw at wala ng iba pang makaaalam sa iyo kundi ikaw...

UGALI

Ang ugali ng isang tao ay hindi batayan ng kanyang pagkatao...Nang tayo'y isilang sa mundo,taglay na natin ang pag-uugaling di kayang burahin ninuman at ng anuman.Kung ano ka ay iyon ka.Tanging ang paraan ng pagsasalita ang magiging batayan upang mahusgahan ang isang nilalang...Sapagkat ang sugat na dulot maling salita ay maaaring gantihan ng sugat din ng salita...Subalit ang sugat na dulot ng maling gawi ay sugat na mahirap gantihan ng maling gawi...lalo na kung ika'y mabuting nilalang...ika nga "action speaks louder than words at the same time action hurts greater than words...."